Хүжийгийн блог

Нээлттэй эхийн хөдөлгөөн интернэтийг өдий зэрэгтэй болоход хүргэсэн гол хүчин зүйлсийн нэг гэж би боддог. Хэрвээ Linux, Apache, PHP, Python гээд олон төслүүд байхгүй байсан бол өнөөдөр интернэт ямар байх байсан бол. Интернэтийн амин судас болох мэдээлэл дамжуулах нээлттэй стандартуудыг ч энд дурдах ёстой.

Миний хувьд нээлттэй эхийн төслүүдийг ихээр хэрэглэдэг, боломжоороо оролцохыг, дэмжихийг хичээдэг. Учир нь дэлхий даяар хөгжүүлэгчдийн хүсэл сонирхол, хоорондын хамтын ажиллагаа, олон нийтийн санал бодол дээр тулгуурлан улам улам боловсронгуй болон хөгжүүлэгдэж байгаа эдгээр олон төслүүдээс ажил хөнгөвчилж, шинэ боломжийг олгож байдаг нь дэндүү олон.

Энэ удаа та бүхэнд сонирхолтой байж магад хэмээн Банжиг.Нээтийн хөгжүүлэлт, дэд бүтцэд ашиглагддаг зарим нэгэн нээлттэй эхийн төслүүдийн тухай товч дурдая гэж бодлоо.
Тест
Хамгийн түрүүнд би LAMP хэмээн онцлохыг хүсэж байна. Учир нь LAMP буюу Linux Apache MySQL PHP дөрвөл нь гайхалтай хамтран ажиллаж Банжиг.Нээтийн үндсэн хөгжүүлэлтийн орчинг бүрдүүлж байдаг билээ. Бид Linux төрлийн нэгэн тархац болох Fedora Core үйлдлийн систем бүхий серверүүд дээр Apache 2 вэб сервер, MySQL 5 өгөгдлийн баазын сервер, PHP 5 хэл ашиглан үндсэн програмчлалаа гүйцэтгэдэг. LAMP дөрвөлийн тухай та бүхэн хангалттай мэдэх бизээ.

Zend Framework: Израйлд төвтэй Zend хэмээх компанийн санаачлан нээлттэй эхийн төсөл байдлаар эхлүүлээд удаагүй байгаа энэхүү фрэймворк нь PHP-ийн сонгодог хэрэглэгч, хөгжүүлэгчид гэж болох компаниудын олон мундаг хөгжүүлэгчдийг эгнээндээ нэгтгэж чадсанаар өнөөдөр аль хэдийн нийтээр өргөн хэрэглэгдэж эхлээд байгаа билээ. Бид ZF-ийн зарим сангуудыг онцгойлон хэрэглэдэг.

Prototype: Үнэхээр мундаг гэж хэлэхээс аргагүй, цомхон атлаа асар хүчирхэг, гайхалтай уян хатан JavaScript фрэймворк. Сүүлийн үеийн Банжиг.Нээт дэх Javascript, Ajax ашигласан хэсгүүдэд бид ихээр хэрэглэж байгаа.

JQuery: Бас л мундаг эд. Маш олон төрлийн Visual User Interface өргөтгөлүүдтэй байдаг нь энэ санг ашиглахаас өөр аргагүйд хүргэдэг юм. Банжиг.Нээт дэх Javascript ашигласан Visual Interface бүхий хэсгүүдэд түлхүү хэрэглэгддэг.

PHP Mailer: Маш цомхон цэгцтэй, өргөтгөхөд хялбар мэйл илгээхэд ашиглагддаг сан.

Securimage: Ашиглахад хялбар, интеграци хийхэд нийцэмж сайтай зэрэг чанаруудад нь татагдаж бид энэхүү CAPTCHA үүсгэдэг PHP санг ашигладаг.

TinyMCE: Маш сайн WYSIWYG засварлагч. Маш сайн өргөтгөгдөх боломж, олон төрлийн вэб хөтлөгч дэмждэг, үүсгэж буй код нь харьцангуй алдаа багатай зэрэг нь бидний сонголтонд нөлөөлсөн гол хүчин зүйлс.

Netpbm: Маш сайн чанартай зураг үүсгэж чаддаг, үйлдэл бүрээрээ тусдаа программ байдлаар ажилладаг зэрэг нь энэхүү зурагтай ажиллах санг ашиглахад хүргэсэн. PHP-ийн GD сангаас чанарын хувьд илүү зураг үүсгэж чаддаг.

YUI: Нээлттэй лиценз бүхий Yahoo! User Interface Library хэмээх сан нь Visual Interface үүсгэхэд хэрэглэгддэг. Үндсэн сангууд нь хэмжээ том, анх ачаалахад удаан зэрэг шалтгаанаар бид цаашид энэ санг ашиглаж хийсэн хэсгүүдээ JQuery рүү хөрвүүлэхээр шийдээд байгаа.

OpenX: Банжиг.Нээт дэх баннер сурталчилгаатай холбоотой бүхий л асуудлыг энэ программ зохицуулдаг. Олон жил тасралтгүй ашиглаж байна.

Эдгээрээс гадна өөр олон сан, технологуудыг бид ашигладаг. Мэдээж тэд бүгд нээлттэй эхийн үнэгүй бүтээгдэхүүнүүд биш, заримыг нь багагүй үнээр худалдаж авсан нь ч бий.

Тэгэхдээ л энд дурдсан шиг олон олон нээлттэй эхийн төслүүд, тэдний бий болгож буй бүтээгдэхүүнүүд бидний ажлыг асар ихээр хөнгөвчилж, цөөхөн хүний хүчээр та бүхэнд Банжиг.Нээтийг бүтээн хүргэхэд чухал нөлөө үзүүлдэг билээ.

Нээлттэй эхийн хөдөлгөөний дэмжигч, оролцогч бүх хүмүүст чин сэтгэлийн талархал илэрхийлье!

Дараачийн бичлэгтээ Монголын бусад сайтуудад түгээмэл хэрэглэгдэж байгаа нээлттэй эхийн болон бусад программуудын тухай товч танилцуулах болно.