Хүжийгийн блог

Хүн надаас энэ ямар уу гэж асуухад би зүгээр гэж хариулдаг. Угтаа энэ бол надад таалагдсан гэсэн үг. Гоё, сайхан, гайхалтай гэдэг үгнүүдийг төдийлөн хэрэглээд байдаггүй. Харин 2 хоногийн өмнө нэг ном нээж үзэнгүүтээ л өөрийн эрхгүй үнэхээр ГОЁ хэмээн дуу алдлаа.

Энэ номыг их олон хүн зохиожээ. Тэгэхдээ ихэнх хүмүүс нь яаж гэдгээ ч мэдэхгүйгээр оролцож. Та бүхний сайн мэдэх Тарчлаан блогийн эзэн маань өөрийн өөрийн блог дээр бичсэн шүлэг, бодол эргэцүүлэлүүдээ нэгтгэн ном гаргасан юм байна.
Тест
Анх барьж үзээд байдаг л нэг шүлгийн ном байхдаа гэж бодлоо. Харин эхний хэдэн хуудсыг эргүүлж үзээд гайхлаа, дахин хэдийг эргүүлж үзээд үнэхээр бахадлаа.

Тарчлаан блогийн эзний нэрийг Одгэрэл гэдэг юм байна. Одгэрэл маань зөвхөн өөрийн бичсэн зүйлсийг номондоо оруулсангүй. Өөрийнх нь бичсэн зүйлд сэтгэгдэл бичсэн хүмүүсийн үгсийг нэртэй устай, өдөртэй цагтай нь оруулжээ.

Зүгээр л нэг шүлэг унших тиймхэн, харин түүнд хандсан өөр олон хүмүүсийн санаа бодлыг нэгтгэн унших хичнээн сайхан. Блог дахь шүлгүүдийг бага багаар унших бас л сайхан, харин бүгдийг нь нэгтгэж цэгцлээд нэг номонд багтаасныг барьж суугаад унших хичнээн сайхан.

Номны хавтасны зураг

Өөр ертөнцийн залууд.. нэр авсан энэ номыг Б.Галаарид гуай редакторлож, сэтгэгдэлүүдийг номын зайнд тохируулан тодорхой хэмжээнд шүүж оруулсан байна. Номын дизайн, уран сайхан дээр ажилласан хүмүүс ч ажлаа сайн хийсэн гэж бодогдлоо.

Блог хөтөлдөг, уншдаг бүх хүмүүст сайхан үлгэр дууриал болон номоо хэвлүүлсэн Одгэрэлдээ амжилт хүсье. Та бүхнийг энэ номыг худалдан авч уншихыг мөн зөвлөж байна.

Блог гэснээс сая хартал Банжигийн блог 8000 гаран болжээ. Нэгхэн блогоос л 200 гаран хуудастай ном төрж байна гээд бодохоор бидний бүтээж буй блог ертөнц үнэхээр их тоогоор хэмжигдэхээр болжээ.

Бүх блогчиддоо амжилт хүсье, блог уншигчиддаа блог хөтлөхийг зөвлөе!