Хүжийгийн блог

Багадаа жимсэнд явдаггүй байсан ч гэсэн сүүлийн үед нилээд хэдэн төрлийн жимс түүлээ. Хамгийн сүүлд хад жимс түүлээ. Уг нь их ойрхоон газар байдаг юм байна. Зайсангийн ам өөд жаахан өгсөөд Банжиг уулзалт болох гэж байгаа Богд Хан гээд амралтын газар бий, түүнээс цааш 20-30 минут аажуухан алхахад жимсэн дунд ороод явчихна даа.

Яагаад гэдгийг мэдэхгүй ямартай ч хад гэдэг жимс маань хад, асгатай газар дагаж өндөр бутанд ургадаг юм байна. Түүхэд их хялбар, шувтраад авахад атга дүүрээд ирэх нь урамтай. Өдий насыг насалчихаад Улаанбаатарт өчнөөн олон жил амьдарчихаад ойрхон гараад жимс түүж үзээгүйг бодоход би амарч чаддаггүй хүн юм байна.
Тест

Хаднаас гадна бөөрөлзгөнө гээд их гоё амттай их эмзэг улаан өнгөтэй жимс бас устай газар дагаад өндөр бутанд ургадаг юм байна. Манай хүн энэ жимсний амтанд нь илүү дурлаад үүнээс их түүж идсэн.

Саяхан Тэрэлж ороод голын сайраар ургасан байсан модноос мойл жимс түүж идсэн. Сайн болоогүй нь таарсан уу яасан идэхээр ам хуурай оргиод, тэгээд ястай болохоор нэг их дурлаж түүсэнгүй.

Энэ 3 жимснээс гадна түрүү жил гүзээлгэнэ, аньс гэдэг 2 төрлийн жимсийг анх удаа түүж үзсэн гэж байгаа.

Ноднин жил наадам өнгөрөөгөөд гэр бүлийнхэнтэйгээ Дугана хадны амралтанд очоод анх гүзээлзгэнийг байгаль дээрээ ургасан байгаагаар нь харсан, түүсэн бас баахан идсэн. Гүзээлзгэнэ түүхэд их авъяас, хараа хэрэгтэй. учир нь бөөн бөөнөөрөө биш тэгээд бас навчныхаа доор нуугдаж ургасан байдаг учраас олж харахад их төвөгтэй юм билээ. Хайж хайж нов ногоон навчис дундаас ув улаан гүзээлгэнэ бөлцийгөөд байж байгааг олж харах ямар сайхан.

Энэ жил нөгөө гүзээлзгэнээ идэнгээ амрах гээд наадмын дараа дахин гэр бүлтэйгээ Дугана хад руу дахин очсон ч яагаад ч юм энэ жил их бага ургасан байна дээ. Тэгсэн гүзээлзгэнэ нэг жил сайн ургаад дараа жил нь бага ургадаг учиртай юм гэнэ. Харин саяхан Зүүн салааны тийш салхинд гарч байгаад чамгүй их гүзээлзгэнэтэй газар олоод жаал идсэн дээ.

Гүзээлзгэнэ голдуу судаг дагаад ургадаг, ус нар жигдэрсэн судгуудаар бүр их ургадаг юм байна.

Өнгөрсөн жил мөн Хагийн хар нуур явж байгаад анх аньс гэдэг жимсийг харсан. Түүхий байсан учраас дараа нь Цэцээ гүн рүү гэр бүлээрээ аялж байгаад болсонтой нь таарч сайхан амтыг нь мэдэрсэн. Аньс жимс анхны цаснаар бүрэн болдог, тэгээд өвөлжин байдаг гэж сонссон. Аньс түүгээд хөлдөөчихөөд өвөл ханиад дарах зорилгоор уудаг гэж мөн мэдсэн. Ер нь аньсыг эмчилгээнд их ашигладаг юм байна.

Цаашдаа ч олон төрлийн жимс үзэж, түүж, амтлах байх. Хэрвээ та Улаанбаатар хотод амьдардаг бол амралтын өдрөөрөө ойрхон салхинд алхангаа байгаль дээрээ зэрлэгээр ургасан олон төрлийн жимстэй тааралдах болно.

Өөрсдийн жимс түүсэн туршлагаасаа, ялангуяа Улаанбаатар хот ойролцоо аль хавьд ямар жимс байдаг тухай мэддэг зүйлсээн харамгүй хуваалцахыг хүсье.

http://en.wikipedia.org/wiki/List_of_fruits хаягаар жимснүүдийн дэлгэрэнгүй мэдээлэл үзээрэй!